Македонската машка ракометна репрезентација, во подготовките за Европското првенство се соочува со нов проблем на позицијата пивот. Поради скршен прст на шутерската рака, Валентин Карасманакис отпадна од комбинација за настап и нема да биде на располагање за континенталниот собир.
Како реакција на овој развој на настаните, селекторот Кирил Лазаров експресно направи корекција во составот и упати повик до Никола Маркоски, кој веќе му се приклучи на националниот тим.
Ова е втор удар за Лазаров на истата позиција, со оглед на тоа што претходно составот остана и без Милан Лазаревски. Во моментов, на линијата од шест метри конкуренцијата ја сочинуваат Жарко Пешевски, Самоил Ристевски, Марко Стојковиќ и Михаил Аларов.
Во рамки на контролниот период пред ЕП, Македонија ќе одигра пријателски натпревар против Хрватска во Пореч на 28 декември, а потоа следува турнир во Винтертур од 8 до 10 јануари, каде ривали ќе ни бидат Швајцарија, Бахреин и Украина.
