По разделбата со српскиот тренер Ален Тупајиќ, раководството на Работнички донесе одлука за нов шеф на стручниот штаб. Клупата на „херојот од Дебар Маало“ од овој момент му е доверена на Муарем Муарем, млад, но веќе докажан македонски стратег, кој во најголемиот дел од есенскиот дел во ПМФЛ го предводеше тимот на Башкими.
Назначувањето на 37-годишниот тренер доаѓа во еден од најтешките моменти во поновата историја на Работнички. Клубот се наоѓа во долниот дел од табелата и го очекува вистинска борба за опстанок во македонската елита. Токму затоа, од Муарем се очекува да внесе свежина, јасна тактичка визија и лидерски пристап, со цел стабилизирање на тимот и подобрување на резултатите во продолжението од сезоната.
Муарем зад себе има солидно тренерско портфолио. Минатата сезона остави силен впечаток со Гостивар, каде што покажа дека знае да работи под притисок и да извлече максимум од тим со ограничени ресурси. Во тековната сезона го водеше Башкими, со кој оствари конкурентни настапи во ПМФЛ и ја потврди својата репутација како тренер со современ пристап и јасна фудбалска филозофија.
Работнички, пак, низ целата есенска полусезона минуваше низ сериозна турбуленција. Сезоната започна со Бојан Маркоски, по што следуваа тренерските ангажмани на Ердем и Бабунски, а есенскиот дел го заврши Тупајиќ. Честите промени на клупата се одразија и на резултатите, па клубот презими со само седум освоени бодови и претпоследно место на табелата, што е далеку под очекувањата и традицијата на овој скопски прволигаш.
Новото поглавје за Работнички ќе започне на средината од февруари 2026 година, кога Муарем Муарем ќе го има своето деби на клупата на „црвено-белите“ на гостувањето кај Пелистер во Битола. Натпревар кој уште на стартот ќе биде сериозен тест за новиот тренер и за неговата визија за излез од кризата.
