Екипата на Големо Коњари е на прагот да ја заврши својата кратка, но значајна епизода во Втората македонска фудбалска лига. Клубот од прилепското село, и покрај големата желба и ентузијазам, реално се соочува со неминовното – преселба во Трета лига по завршувањето на сезоната.
Во табеларна смисла, Големо Коњари тешко може да избега од зоната за испаѓање, а и самата управа, стручниот штаб и фудбалерите се свесни за моменталната ситуација. Сепак, и покрај резултатскиот биланс, клубот може да биде задоволен од она што го прикажа надвор од теренот.
Во текот на летото беа исполнети сериозни инфраструктурни услови – реновиран беше теренот, подобрени беа соблекувалните и создадени услови за натпреварување на домашен терен, нешто што во еден момент беше доведено под прашање. Под водство на претседателот Тони Даноски, клубот покажа дека има организациски капацитет и стабилна основа за понатамошно функционирање.
Враќањето во Втората лига по долга пауза донесе живот во селото, многу публика и фудбал од повисок ранг, што беше сон на локалната заедница со години. Иако престојот ќе биде краток, тој имаше своја тежина и значење.
Според информации на Спортска Мрежа, Големо Коњари сака и во следните сезони да биде конкурентен во Трета лига, како организациски така и резултатски, да се бори за горниот дел од табелата и да изгради стабилен тим за иднината.
Во минатото многу екипи кои испаднале од Втора лига се распаѓање, како што беше лани случајот со Вардарски од Богданци кој испадна од Втора лига и се распадна и не пријави учество во Трета лига – Исток, а од друга страна пак Братство од Житоше по испаѓањето од Втора лига – Исток, исто така не продолжи во Трета лига – Југ, но имало и многу други примери во минатото.
Пролетниот дел од Втората лига стартува на 21 февруари 2026 година, а до крајот на сезоната Големо Коњари ќе се обиде достоинствено да го одигра пролетниот дел и на достоинствен начин да се одјави од Втора лига.
