Фудбалскиот клуб Силекс веќе ги повлече првите потези во зимскиот преоден рок, најавувајќи промени во ростерот во пресрет на пролетниот дел од сезоната, во кој кратовчани ќе водат сериозна битка за европските позиции.
Клубот официјално се раздели со три фудбалери – двајца странци и еден домашен играч, со што се отвора простор за освежување на тимот во продолжението од шампионатот.
Кратово го напушта офанзивецот Алдин Хрвановиќ, кој пристигна од Слобода Тузла и остави солиден белег во есенскиот дел. Босанецот настапи на 15 прволигашки натпревари и постигна три погодоци, а беше исклучително ефикасен и во Купот, каде на два меча реализира три гола. Во европските квалификации за Конференциската лига на УЕФА, Хрвановиќ запиша уште еден погодок на два настапи.
Од редовите на Силекс си заминува и Миљан Говедарица, 31-годишно лево крило од БиХ. Тој во Првата лига одигра десет натпревари, постигна еден гол и додаде две асистенции, додека во Купот беше прецизен двапати. Говедарица беше дел и од европските настапи на кратовчани ова лето.
Третото име кое повеќе нема да биде дел од Силекс е Бојан Рајков. Десниот бек беше член на клубот од 2021 година и оваа есен запиша десет настапи, при што се истакна со три асистенции, давајќи значаен придонес во офанзивната игра од последната линија.
Со овие промени, јасно е дека Силекс влегува во фаза на селекција и прилагодување, со цел тимот да биде уште поконкурентен во борбата за врвот и европска виза во пролетниот дел од сезоната.
