Вардар и пивотменот Милан Лазаревски ја продолжија соработката, па така, играчот ќе остане дел од црвено-црното семејство и во наредните две сезони. Лазаревски се врати во Македонија во 2022 година и оттогаш е еден од клучните столбови на тимот.
Со новиот договор, Вардар ја задржува својата пивотменска ѕвезда, која со својот карактер, труд и професионален однос кон клубот претставува пример за младите ракометари. Играчи како Милан, кои во целост ги прифатиле вредностите и обврските на црвено-црниот дрес, се темелот врз кој клубот гради тим за подолг рок.
Навивачите во „Јане Сандански“ и во наредните две сезони ќе го гледаат еден од најборбените играчи во тимот. Неговата енергија, жестината во дуелите и подготвеноста да се жртвува за секоја топка многупати досега ја подигнуваа публиката на нозе и беа инспирација за соиграчите.
Продолжувањето на договорот со Милан Лазаревски е јасна порака од Вардар дека клубот гради стабилен и конкурентен тим, кој ќе се бори за трофеи со играчи кои ја знаат вредноста на црвено-црниот дрес и се посветени на заедничкиот успех.
