Подготовките на машката ракометна репрезентација на Македонија за настапот на Европското првенство кое ќе се одржи во Данска, Шведска и Норвешка започнуваат денеска со првиот собир на националниот тим.
Во рамките на подготовките, македонските ракометари ќе настапат на турнир во швајцарскиот град Винтертур, кој ќе се одржи од 8 до 10 јануари. На овој турнир Македонија ќе ги одмери силите со селекциите на Швајцарија, Бахреин и Украина, по што експедицијата ќе се упати кон Данска, каде што ќе се игра Европското првенство.
Селекторот Кирил Лазаров повика 21 ракометар, кои ќе ја минат почетната фаза од подготовките. Таа ќе биде заокружена со пријателски натпревар против селекцијата на Хрватска, кој ќе се одигра во Пореч.
По новогодишните празници, репрезентацијата накратко ќе тренира во Скопје, по што ќе бидат дефинирани ракометарите кои ќе патуваат за Хернинг, еден од градовите домаќини на континенталниот собир.
Пред почетокот на Европското првенство, можно е одигрување и на уште еден контролен натпревар. Македонија ќе го започне настапот на шампионатот на 16 јануари со дуел против домаќинот Данска, додека во групната фаза ќе се соочи и со селекциите на Португалија на 18 Јануари и Романија на 20 Јануари.
