Еурофарм Пелистер 2 се врати на победнички патеки и со сигурна партија пред својата публика го совлада составот на Пролет 62 со 32-25, останувајќи во игра за пласман во плеј-офот на ракометната Суперлига.
Младите битолчани уште од стартот наметнаа висок ритам и брзо стекнаа предност од 5:1, со што јасно ставија до знаење дека бодовите ќе ги бараат само на своја страна. Гостите од Скопје накратко се вратија во игра и намалија на 7:4, но тоа беше сè од нив во првото полувреме. Домашниот тим фати серија, ја зголеми разликата и на пауза замина со убедливи 16:9.
Во продолжението, Пролет се обидуваше да парира и да ја намали негативата, но Еурофарм Пелистер 2 рутински ја контролираше играта и не дозволи резултатска неизвесност. Со дисциплинирана одбрана и ефикасен напад, битолчани ја одржуваа предноста до самиот крај и заслужено стигнаа до триумф од 32:25.
Најрасположен во редовите на победникот беше Мохамед Азис, кој реализираше десет погодоци, додека значаен придонес даде и Петар Марковски со седум гола. Кај Пролет 62 се истакна Давор Палевски со седум реализации, а Андреј Стојановски додаде шест.
Со оваа победа, Еурофарм Пелистер 2 ја задржа надежта за место меѓу најдобрите и позитивно ја заокружи есенската полусезона, додека Пролет продолжува со серијата резултатски проблеми.
