Македонскиот репрезентативец Ставре Јада изминатиот викенд забележа одлични резултати на две меѓународни ФИС трки, уште еднаш потврдувајќи дека е најзначајниот амбасадор на македонското нордиско скијање.
Јада прво настапи на трката на 10 километри во Санта Катерина Валфурва во Италија, каде во конкуренција од 55 врвни светски скијачи го освои 33. место и запиша 118 ФИС поени.
Само еден ден подоцна, македонскиот скијач имаше уште подобар резултат на трката во Сент Мориц, Швајцарија. Во многу силна конкуренција од 103 натпреварувачи, Јада стигна до високото 23. место, освојувајќи 115 ФИС поени.
Од Скијачката федерација на Македонија упатија честитки до Јада и неговиот тренер Пламен Неделков за континуираната посветеност, напредок и успешното претставување на државата на меѓународната ски сцена.
Македонското скијање продолжува да чекори напред, а Јада и во следните трки ќе биде меѓу главните носители на нашите надежи за нови добри резултати.
