Градоначалникот на општина Ново Село, Ѓорѓе Божинов, оствари работна средба со претседателот на Општинскиот фудбалски сојуз Струмица, дел од ФФМ, Илија Илиев – Ромата.
На средбата се разговараше за унапредување на соработката во рамките на општинската лига, за тековната поддршка која општината ја дава на локалниот клуб ФК Огражден, како и за идните проекти со кои ќе се инвестира во фудбалската инфраструктура во Ново Село.
„Денес остварив средба со претседателот на Општинскиот фудбалски сојуз Струмица, дел од Фудбалската федерација на Македонија, Илија Илиев. Разговаравме за соработката во општинската фудбалска лига, поддршката која општина Ново Село ја дава на ФК Огражден и за идните инвестиции кои општината ќе ги спроведе на фудбалскиот стадион во Ново Село. Спортот и младите се врвен приоритет на нашата општина“, рече градоначалникот на општина Ново Село, Ѓорѓе Божинов, по средбата со Илиев.
ФК Огражден, единствениот претставник од општина Ново Село во Општинската фудбалска лига на Струмица, имаше успешна есенска полусезона. Тимот го заврши првиот дел од сезоната на четвртата позиција со учинок од три победи, три ремија и еден пораз, освоени 12 бодови и респектабилни партии против водечките екипи.
Како што нагласи градоначалникот Божинов, општина Ново Село и во иднина ќе стои силно зад ФК Огражден – и со институционална поддршка, и со реализација на нови инвестиции за уредување и подобрување на фудбалскиот стадион. Целта е создавање подобри услови за младите спортски таленти и развој на локалниот спорт.
