Андреј Јакимовски уште еднаш покажа колку голем потенцијал носи во себе, блескајќи и на гостински терен во Националната Арена во Даблин.
Нашиот репрезентативец го заврши дуелот со Ирска со импресивни 26 поени, 5 скока и 4 асистенции, учинок кој силно придонесе за убедливата победа од 88:76.
„Ова е многу важна победа за нас. Мечот беше физички и тежок, знаевме дека играме на гости и дека судиите и публиката ќе бидат на страна на домаќинот. Но најбитно е што останавме тим до самиот крај. Нашата хемија беше клучна и се боревме сите 40 минути.
Имавме проблем со дефанзивниот скок, што нè доведе во непријатна ситуација на стартот, но со мали корекции успеавме да ја донесеме оваа многу важна победа. Си ја завршивме работата 99%, но нè очекуваат уште два меча во февруари.
Задоволен сум од начинот на кој одигравме, особено бидејќи бевме кратко време заедно и немавме целосни подготовки. Ги искористивме сите можности и земавме значајни бодови. Се надевам дека во февруари ќе бидеме комплетни. Ова е уште еден чекор кон главната цел – квалификациите за ЕП 2029“, истакна Јакимовски.
