Силекс и Арсими денес го отвораат 15. коло од Првата македонска фудбалска лига, а Кратово повторно ќе биде центар на вниманието. Домашниот тим влегува во дербито со респект кон противникот, кој во претходното коло го совлада актуелниот шампион Шкендија и ја потврди одличната форма.
Во кратовскиот табор владее претпазлив оптимизам – свесни се за квалитетот на Арсими, но веруваат дека домашниот терен и целосната фокусираност можат да ја наклонат вагата на нивна страна.
Токму на тоа се надоврзува и шефот на стручниот штаб, Александар Васоски, кој ги упати своите очекувања во пресрет на денешниот дуел.
„Не чека тежок натпревар против Арсими, екипа која ја има мојата почит. Не само поради победата над Шкендија, туку поради фактот што во континуитет игра добро. Играме на домашен терен и можеби тоа не прави благи фаворити, но знаеме дека нема да биде лесно. Меѓутоа ако сакаме да бидеме при врвот мораме да победиме. Сите сме сконцентрирани само кон овој натпревар, и очекувам една квалитетна претстава и победа на Силекс“, рече Васоски.
Силекс ќе брка важни бодови кои би можеле да го задржат тимот во борба за самиот врв, додека Арсими доаѓа охрабрен од големиот триумф во минатото коло. Се очекува цврст, интензивен и резултатски неизвесен дуел во Кратово.
