Отља конечно ја запиша првата сезонска победа во Трета лига – Север, славејќи со 2:3 на калливиот терен во Доброшане против Лопати, тим кој исто така е нов третолигаш. Мечот од 13. коло понуди голема борба, полн интензитет и драматичен финиш – а најголемата приказна беше јунакот на гостите, Фатон Нуредини.
Гостите од општина Липково рано дојдоа до предност. Сабри Ибиши го отвори резултатот уште во 12. минута, а Ќендрим Абази со прецизен удар во 36. минута зголеми на 0:2. Лопати сепак не се предаде – во самиот финиш на првото полувреме Мухарем Исени намали на 1:2 и внесе неизвесност.
Во вториот дел, домашниот тим успеа да израмни преку Ендрит Мехмети, кој во 73. минута го постави резултатот на 2:2. Но токму тогаш повторно блесна најборбениот фудбалер на теренот – Ибиши со својот втор гол донесе конечни 2:3 и историска прва победа за Отља.
Посебно внимание привлече големата пожртвуваност на 26-годишниот Фатон Нуредини, чија фотографија по натпреварот стана симбол на борбеноста на Отља. Нуредини буквално беше „обоен“ во кал – покриен од глава до пети, тој беше меѓу клучните играчи во оваа победа симболично ја претстави борбената филозофија на клубот.
На другата страна, некогашниот второлигаш Кадино продолжува со очајната форма и доживеа тежок пораз од 9:0 на гостувањето кај Аеродром. Проблемите кај гостите се очигледни – допатуваа со само 11 играчи и без ниту еден фудбалер на клупата, па исходот беше очекуван.
Стефан Богдановски постигна четири гола за Аеродром, а по еден гол во вториот дел додадоа Леонид Стојановски, Александар Кажлевски, Мартин Атанасовски, Јусуф Мемедовски и Мартин Ацески.
Колото ќе биде комплетирано денес со преостанатите натпревари.
