ГРК Охрид одигра маестрален натпревар и забележа значајна победа против тимот на Алкалоид, совладувајќи го со 28-24 во дербито на 12. колото во македонската Суперлига.
Од самиот почеток се гледаше дека охриѓани се решени да го срушат фаворитот и тоа го направија на импресивен начин. Екипата на Борис Ројевиќ делуваше цврсто во одбраната, брзо во транзиција и ефикасно во нападот, предводена од Тилен Стрмљан кој блескаше со 11 погодоци и заслужено беше најдобар играч на натпреварот.
По израмнетото отворање и резултат 6-6, домашните направија серија и се одлепија на 10-6, а до полувремето ја сочуваа предноста која изнесуваше 17-11. Гостите од Автокоманда имаа многу проблеми со реализацијата и техничките грешки, додека голманите Галевски и Кизиќ немаа своја вечер.
Во вториот дел, тимот на Кирил Лазаров се обиде да се врати во игра. Браќата Марко и Дамјан Митев со неколку убави акции ја преполовија разликата (20-17), но Охрид брзо одговори преку Анте Иванковиќ, кој со два врзани гола повторно ја врати стабилноста на домашниот состав.
Алкалоид стигна до минус два (22-20), но тоа беше максимумот. Во финишот повторно доминираа охриѓани, поддржани од публиката која стоечки го поздрави секој погодок. Блажески со неколку клучни интервенции на голот ја запечати судбината на гостите, а „гладијаторите“ стигнаа до триумфот со кој сега се на третата позиција на табелата – веднаш зад Вардар и Пелистер.
Во следното коло, Охрид го очекува езерското дерби против Струга, додека Алкалоид на домашен терен ќе се обиде за враќање на победнички пат против Тиквеш.
