Фудбалскиот талент Салим Арифи, поранешен играч на Победа, блеска во дресот на Митровица, каде што е убедливо најдобар стрелец во Втората косовска лига со вкупно 9 постигнати голови. Само минатиот викенд, 19-годишниот Арифи запиша хет-трик во победата на неговиот тим со 3-1 против Дарданија, со што уште еднаш покажа зошто во Косово го нарекуваат „новиот Мирлинд Даку“.
Арифи со својата висина од 193 сантиметри, физичка моќ и инстинкт за гол, потсетува на напаѓачот на албанската репрезентација и е вистински кошмар за противничките одбрани. Неговиот брз напредок не помина незабележано – неколку клубови од Првата лига и косовската Суперлига веќе го следат внимателно, а интерес покажуваат и странски тимови.
Овој млад напаѓач, кој потекнува од Прилеп, зад себе има над 100 голови во сите младински категории на Победа, а со своите настапи во Косово докажува дека е подготвен за повисоко ниво.
Интересно е што Арифи поседува и косовски пасош, по потекло на неговите родители, па постои можност Фудбалската федерација на Косово да го повика во младинските селекции. Од друга страна, ова е сигнал и до ФФМ внимателно да го следи развојот на Арифи – бидејќи станува збор за талент кој може да биде иднината на македонскиот фудбал.
