Вечерва од 19 часот, во салата на СРЦ „Кале“ во Скопје, ќе се одржи првиот собир на женската сениорска кошаркарска репрезентација на Македонија. Од денес започнува првиот циклус од квалификациите за Европското првенство 2027 година.
Нашата репрезентација, која се наоѓа во групата „Ф“, во периодот од 12 до 18 ноември ќе одигра три натпревари. Со оглед на краткиот подготовен период, стручниот штаб предводен од селекторот Александар Ашаданов организираше мини-подготовки кои ќе започнат веднаш по првата прозивка.
Првиот натпревар во квалификациите Македонија ќе го одигра во среда, 12 ноември, кога во Скопје гостува селекцијата на Данска. Натпреварот ќе започне во 17 часот и ќе се одигра во салата на СРЦ „Кале“.
Во рамки на овој ноемвриски ФИБА „прозорец“, нашите кошаркарки ќе ги одмерат силите и со Грција (15 ноември, во Скопје) и со Хрватска (18 ноември, во Славонски Брод).
Согласно планираните активности, сениорките ќе имаат уште два тренинзи на 11 ноември – утрински од 10:30 до 12:00 часот и вечерен од 19:15 до 20:45 часот. Тренинг ќе има и на самиот ден на натпреварот со Данска, во терминот од 9:00 до 10:00 часот.
Селекторот Ашаданов за овој квалификациски циклус повика вкупно 16 кошаркарки:
- Анџелика Митрашиновиќ (Фрибург – Швајцарија)
- Илина Селцова (Серко Уни Ѓер – Унгарија)
- Мерит Хемпе (Сарагоса – Шпанија)
- Александра Стојановска (Неа Јониа – Грција)
- Матеа Николиќ (Баскет Алкамо – Италија)
- Тијана Митрева (Баскет Алкамо – Италија)
- Милица Николиќ (Рас – Србија)
- Ања Начевска (Мега – Србија)
- Ивана Кметовска (Баскет Кам 2011)
- Цветанка Димова (Баскет Кам 2011)
- Михаела Алексовска (Крива Паланка)
- Мартина Маркоска (Бадел 1862)
- Ива Чолакоска (Бадел 1862)
- Марија Николов (Бадел 1862)
- Елена Тасевска (Вардар)
- Јана Пислевска (Вардар)
