Во вистинска фудбалска драма што се одигра на националната арена во Скопје, Вардар со гол во последните моменти славеше над Силекс со 2-1 и ја задржа лидерската позиција во Првата македонска фудбалска лига.
Црвено-црните на Гоце Седлоски повторно покажаа шампионски карактер, откако до трите бода стигнаа со гол од пенал во судиското надополнување, по интервенција на ВАР системот.
Дербито започна со отворена игра и темпо кое ветуваше многу. Гостите од Кратово уште во првата минута можеа да поведат преку Додев, но голманот Талески беше буден.
Одговорот на Вардар следуваше брзо — во деветтата минута Азер Омерагиќ ја казни несигурноста во одбраната на Силекс и со прецизен удар му донесе предност на својот тим.
Само пет минути подоцна, Хрвановиќ ја реализираше акцијата на Пирес и донесе израмнување на 1-1, па до крајот на првото полувреме се играше динамичен фудбал со неколку убави прилики пред двата гола. Најблиску до нов гол беше Роџерс Мато, но неговите обиди не резултираа.
Во второто полувреме Вардар ја презеде контролата врз натпреварот, додека Силекс се повлече на својата половина. Гостите останаа со играч помалку во 85. минута, кога голманот Љупче Џеков беше исклучен поради фаул надвор од казнениот простор врз Спахиу.
Кога сите очекуваа крај со поделба на бодовите, во продолжението судијата Фатмир Бафто по ВАР преглед покажа на белата точка поради игра со рака во шеснаесетникот на Силекс. Одговорноста ја презеде Мато, кој во 100-тата минута беше прецизен и донесе ерупција на радост кај домашните навивачи.
Со оваа победа Вардар останува на врвот на табелата со бод повеќе од Струга, а во следното коло го очекува големото „вечно дерби“ против Пелистер во Битола. Силекс, пак, ќе бара поправен на гостувањето во Струмица против Брера.
