Денес беше комплетирано 6. коло од Трета лига – Запад со три натпревари, а натпреварот меѓу Зајази и Џепчишти, не се одигра, бидејќи екипата на Зајази како што дознава Спортска Мрежа се откажа од понатамошно натпреварување.
Трите бодови останаа во Брвеница, откако Вардар со 3:0 го доби тимот на Љуботен. Марко Стојковски во 17. минута го отвори резултатот, а во 31. минута Филип Аризанкоски си постигна автогол за 2:0 на полувреме.
Во вториот дел Ивица Костадиноски во 76. минута ги постави конечни 3:0 со што Вардар Брвеница забележа висока победа.
Неверојатен натпревар одиграа Скендербеу и Влазерими во Порој, откако натпреварот имаше неверојатен финиш со три гола во судиското надополнување, за поделба на бодовите (2:2).
Мурат Адили во 79. минута го отвори резултатот за водство на Влазерими, а самиот финиш донесе вистинска резултатска лудост. Арлинд Бајрами во 92. минута израмни на 1:1. Но, само по две минути Иве Трифуновски постигна гол за ново водство на кичевскиот тим од 1:2. Таман кога сите помислија дека тука е се решено, Ќендрим Аљиљи во 95. минута погоди за конечни 2:2 и делба на бодовите.
Судиската тројка на чело со Дарко Радески и неговите помошници Александар Ѓорѓески и Илчо Пауноски беа на висината на задачата на овој дерби меч, кој имаше луд финиш, а контролор на истиот беше Музафер Исмаили, додека пак делегат Ваљедин Мусли.
Со четири гола, а за поделба на бодовите Речица и Доброшти одиграа 2:2. Агон Хашими во 37. минута погоди за 0:1 на полувреме. Во вториот дел Речица направи комплетен прескурт преку Емран Матоши во 58. минута и преку Мубарек Шасивари во 72. минута за водство од 2:1. На три минути до крајот Хашими со втор гол ги постави конечните 2:2
Како што веќе објави вчера Спортска Мрежа екипата на Напредок ја декласираше Дрита со 4:0, а пак лидерот Камјани беше пресилен за Ренова со 2:6.
Камјани е лидер со 18 бодови, а на делба на второто место се Напредок и Влазерими со по 13 бодови.
