Со мало пролонгирање, денес стартува новата сезона во Првата женска кошаркарска лига. Во шампионатот ќе се натпреваруваат осум екипи, а системот ќе опфати два дела – двокружен натпреварувачки период и дополнителна еднокружна фаза пред плеј-офот.
Актуелниот шампион Баскет Кам од Македонска Каменица повторно ќе ја брани титулата, со минимални промени во ростерот. На клупата сега е Тони Симиќ, кој ја наследи Жаклина Стојановска. Кметовска, Димова, Адамовска, Поп-Димитровска и Максимовска ќе ја носат главната улога и оваа сезона.
Главни конкуренти на шампионките се очекува да бидат екипите на Крива Паланка, Вардар и Бадел 1862. Крива Паланка влезе во сезоната со три странски засилувања, Вардар ќе се потпре на домашен состав со младински репрезентативки, додека Бадел го врати во редовите својот адут Ива Чолакоска.
Во првото коло ќе се сретнат Вардар – Спорт Тим, Крива Паланка – Патриот 2026 и Пробаскет – Бадел 1862, додека на 22 октомври ќе се одигра дербито меѓу МЗТ Бела Вода и актуелниот првак Баскет Кам.
