Ракометниот клуб Струга го засили својот состав со млад и перспективен бек од Тунис – Ахмед Мајдуб, кој веќе им се приклучи на новите соиграчи и се очекува да дебитира на следниот натпревар против Пролет.
Мајдуб има 22 години, висок е 194 сантиметри, и важи за играч што може ефикасно да настапува во двата правци. За него ова ќе биде прво интернационално искуство, откако досега ги бранеше боите на Меднин во својата татковина.
Со неговото доаѓање, тој станува втор странски ракометар во редовите на стружани, по српскиот голман Александар Ѓурѓевиќ.
По осум одиграни кола, Струга има две победи и шест порази, со вкупно четири бодови, и се наоѓа на десеттата позиција во табелата на Суперлигата. Наредниот дуел на домашен терен против Пролет ќе биде можност тимот да се избори за трет триумф и да направи чекор напред кон остварување на својата цел – директен опстанок во Суперлигата, откако минатата сезона екипата на Струга играше бараж за опстанок против Мулти Есенс.
