Ракометарите на ГРК Охрид без никакви проблеми како на тренинг натпревар се пласираа во третото коло од ЕХФ Европскиот Куп, откако и на реваншот во Охрид повторно го декласираа Баку од Азербејџан, овојпат со 38-21. Со тоа, охридскиот тим го комплетираше двомечот со неверојатна гол-разлика од 82-32.
И покрај бројните отсуства во составот, охриѓани одиграа убедливо и дисциплинирано. Борис Ројевиќ овојпат им даде предност на младите сили, оставајќи неколку стандардни играчи на клупата. Без капитенот Ојлески, искусните Чаневски, Иванковиќ, како и повредените Јотиќ и Вејин, охридскиот состав изгледаше максимално мотивирано и во експериментален ростер ја демонстрираше класата.
Публиката во салата во Охрид можеше да ужива во настапот на младите домашни ракометари Трајчески, Ристески, Пупунцоски, Крстевски и Шипинкоски, кои практично целиот меч добија шанса на паркетот.
По првото полувреме, резултатот 23-9 веќе го најави исходот, а во продолжението домаќините рутински ја одржуваа предноста и со висока ефикасност во нападот го казнуваа секој пропуст на противникот.
Давид Савревски беше прв стрелец со девет погодоци, Кукуловски додаде седум, а Шипинкоски се запиша шест пати. На голот блеснаа Блажески со девет одбрани и Крстевски со седум успешни интервенции.
Охрид со оваа двојна победа најави дека е подготвен за повисоки цели во европската сцена и дека и покрај проблемите со повреди и ротации, колективниот дух останува најголемата сила на „гладијаторите“ од Охрид.
