Екипата на Брегалница Штип го доби дербито против Скопје, во последниот натпревар од 8. коло во Втората македонска фудбалска лига, кој се одигра под рефлектори на Градскиот стадион во Штип. „Сините“ славеа со 2-0, со што го заокружија ова коло и се вратија на првото место на табелата.
Стефан Костов го отвори резултатот со прецизен удар во првото полувреме, носејќи ѝ предност на Брегалница од 1-0 – резултат со кој двете екипи заминаа на одмор.
Во вториот дел, Скопје се обидуваше да израмни, создаваше неколку полушанси, но домаќините беа тие кои го контролираа темпото и ја потврдија победата во финишот.
Резервистот Давид Калпачки, кој минатата сезона беше најдобар стрелец на штипјани, со убав погодок во 85. минута ги постави конечните 2-0.
Со овој триумф, Брегалница повторно се искачи на врвот на табелата со 20 бодови, колку што има и Шкендија Арачиново, која е втора поради послабата гол-разлика. На третото место се наоѓа Беласица со 16 бодови.
Со овој натпревар официјално беше затворено 8. коло во Втората лига. Извештајот од останатите натпревари е достапен овде.
