Европската ракометна федерација (ЕХФ) ја објави листата на арбитри кои ќе ја делат правдата на претстојното Европско првенство во ракомет за мажи, што ќе се одржи во Данска, Шведска и Норвешка во јануари 2026 година.
На листата се најдоа вкупно 18 судиски двојки од цела Европа, а меѓу нив два македонски пара, што претставува историски момент за македонското судиско тело. Со тоа, Македонија, заедно со Шпанија, е единствената земја што ќе има двојна судиска претстава на континенталниот собир.
Своето деби на големо натпреварување во сениорска конкуренција ќе го имаат Димитар Митревски и Благојче Тодоровски, додека искусниот пар Славе Николов – Ѓорѓи Начевски повторно ќе биде дел од елитата на европските арбитри.
Номинацијата претставува значајно признание за континуираниот напредок и професионалноста на македонските ракометни арбитри, кои со години уживаат висока доверба во рамките на ЕХФ.
Европското првенство во 2026 година ќе се одржи во Хернинг, Осло, Малме и Кристијанштад, во периодот од 15 јануари до 1 февруари 2026 година.
