По слабите резултати на стартот од сезоната, ракометниот клуб Куманово реши да интервенира во ростерот и да донесе засилување на левата бековска позиција. Нов член на тимот повторно е српскиот интернационалец Огњен Радојиќиќ, кој веќе ги бранеше боите на Куманово пред две сезони.
Радојиќиќ, роден во 2000 година, висок 198 сантиметри, важи за силен и продорен лев бек со одличен шут од далечина. Тој се приклучува на екипата на тренерот Љубиша Димковски со цел да помогне во стабилизирање на формата и подобрување на резултатите по тешкиот старт во Суперлигата.
„Искрено, не се двоумев кога повторно ме повикаа од Куманово. Без размислување се вратив во клубот каде што пред две години поминав убав дел од мојата кариера. Ќе направам сè што можам овој резултатски лош период тимот да го надмине и да се вратиме на победничките патеки“, изјави Радојиќиќ по потпишувањето на договорот.
Куманово во досегашниот дел од сезоната има само една победа и пет порази по шест одиграни кола, па новото засилување се очекува да донесе потребна енергија и искуство во борбата за повисок пласман во првенството.
