Македонската А репрезентација со полн состав ги одработува подготовките за претстојните натпревари од квалификациите за Светското првенство 2026, против Белгија (10 октомври, Гент) и Казахстан (13 октомври, Скопје).
Напаѓачот на Глазгов Ренџерс, Бојан Миовски, смета дека двата дуели имаат историско значење за македонскиот фудбал.
„Знаеме против каква репрезентација играме. Веќе сме во последната фаза од квалификациите, а досега покажавме дека знаеме да играме фудбал, затоа и се наоѓаме во ваква позиција. Во моментов сме први во групата, со гол-разлика 11:2. Ако некој пред почетокот на циклусот ни кажеше дека ќе бидеме во ваква ситуација, сите ќе бевме презадоволни, но работата сè уште не е завршена,“ изјави Миовски.
Тој додаде дека свесно влегуваат во еден од најтешките натпревари во групата, но и дека веруваат во своите сили:
„Белгија е врвна репрезентација, деведесет отсто од нивните играчи настапуваат во топ петте европски лиги. Но ние играме како тим, тоа веќе сме го докажале. Знаеме дека ќе имаме голема поддршка од нашите навивачи, и верувам дека ќе видат одличен фудбал. Овие натпревари, заедно со оние против Казахстан и Велс, се едни од најбитните во поновата историја на нашата репрезентација.“
