Капитенот на машката одбојкарска репрезентација на Македонија, Никола Ѓоргиев, од Букурешт внимателно ја следеше ждрепката за Европското првенство 2026 (ЕвроВолеј), која синоќа се одржа во Бари. Неговиот заклучок е јасен – тешка ждрепка, но со оптимистички тон и силна верба во тимот.
Македонија ќе биде дел од групата Б во Варна, каде ќе се соочи со домаќинот и актуелен светски вицешампион Бугарија, како и со Полска, Украина, Португалија и Израел.
„Овојпат на Европското првенство влегуваме без еуфорија и големи очекувања, за разлика од 2023 година кога бевме домаќини и имавме нешто полесна ждрепка. Сега сме најслабо рангираната селекција во групата и сите противници не гледаат како на тотални аутсајдери,“ изјави Ѓоргиев.
Добивме навистина силна група со два изразени фаворити – Бугарија и Полска. Украина, Португалија и Израел се репрезентации со кои ќе водиме голема борба, но никој не може да ни забрани да сонуваме за осминафинале. Важно е да сме живи, здрави и сплотени, додаде капитенот.
Ѓоргиев потенцира дека Македонија ќе влезе во првенството со поинаков пристап и повеќе искуство:
Сега знаеме како е и да се победува и да се губи. Имаме три Европски првенства зад нас и знаеме што нè очекува. Ќе ја играме нашата игра, ќе работиме напорно и ќе бидеме најдобри кога ќе биде најпотребно. Потешко можеше, но можеше и полесно – најважно е што повторно сме дел од едно големо натпреварување и тоа само по себе е големо задоволство.“
