Камјани неприкосновен, Ренова убедлива, Вардар Брвеница славеше пред својата публика

Денес беше комплетирано четвртото коло во Третата лига – Запад. Откако вчера, како што веќе објави Спортска Мрежа, беа одиграни дел од натпреварите, денес се одиграа и преостанатите дуели.

Лидерот Камјани ја продолжи победничката серија и по четири кола има максимални 12 бодови. Екипата од Камјани славеше на гостувањето кај Зајаз со убедливи 0-3, а стрелци беа Ветон Бафтиари во 16. минута и двојниот стрелец Хузри Џемаили, кој го потврди триумфот на гостите.

Поранешниот прволигаш Ренова исто така оствари висока победа на домашен терен, совладувајќи го Доброшти со 5-2. За тимот од Џепчиште во листата на стрелци се впишаа Гент Јакупи, Ермал Саити и Линд Зендели, додека Ерзен Ходаи двапати ја погоди мрежата на гостите. За Доброшти стрелци беа Адис Фетаи и Агон Хашими.

Во Брвеница, Вардар со резултат од 3-1 беше подобар од Дрита. Домашниот тим дојде до трите бода со головите на Даниел Радевски, Тони Брњарчевски и Славче Антовски, додека единствениот погодок за гостите го постигна Брендим Рушити.

Екипата на Речица доживеа домашен пораз од Влазерими со 0-2. Гостите поведоа во првото полувреме со голот на Албулен Имери, а во вториот дел конечниот резултат го постави Леонтин Бајрами.

Со ова коло, Камјани останува лидер со максимален учинок.

Вчера, Џепчишти славеше домашен триумф од 2:0 над Љуботен, а пак Напредок во Кичево со убедливи 4:1 го доби Скендербеу. Извештајот за овие два натпревари е достапен овде.