Младиот и надежен тенисер Алексеј Стојановски во тандем со Германецот Максимилијан Хајцик стигнаа до титулата на меѓународниот турнир „Скопје Опен“ за играчи до 14 години, кој неодамна се одржа на терените на ТК Југ во главниот град.
Двојката Стојановски-Хајцик во финалето одигра одличен меч и на убедлив начин ги совладаа Иван Трпковски и Марко Павловиќ, со што ја освоија шампионската титула.
Во поединечна конкуренција најдалеку од македонските тенисери стигна Андреј Темов, кој по голема борба беше поразен со 2-1 во сетови од Марко Павловиќ, тенисерот кој на крајот го освои турнирот.
Кај девојчињата, најдобар резултат имаа Ивана Божиновска и Деа Крстевска. Двете млади македонски тенисерки настапија во конкуренција на двојки и го завршија турнирот како полуфиналистки, со што уште еднаш ја потврдија својата перспектива.
