Македонската најдобра тенисерка Лина Ѓорческа не успеа да ја мине втората рунда на силниот ВТА W125 турнир кој неделава се одржува во Самсун, Турција. Нашата претставничка денеска беше поразена од Белгијката Софија Костулас со 2:0 во сетови (6:1, 6:4), во меч кој траеше час и 21 минута.
Костулас, која се наоѓа на 165. место на ВТА листата и е осма носителка на турнирот, ја оправда фаворитската улога. Во првиот сет белгиската тенисерка рано направи два брејка и го доби со убедливи 6:1. Вториот сет беше нешто поизрамнет, но Костулас со раниот брејк за водство од 2:1 успеа да ја задржи предноста до самиот крај и да го затвори мечот во своја корист.
И покрај поразот, Ѓорческа ќе запише позитивен настап – со пласманот во второто коло освои 15 ВТА поени, како и парична награда во износ од 2.000 американски долари.
