Богданци се подготвува за ракометен спектакл, в сабота се игра големото ракометно дерби во Првата лига меѓу Младост и Вардар Неготино, во рамки на 3. коло од Првата лига. Гостинот од Неготино го очекува вистински „пекол“, а салата ќе грми во еден глас како силна поддршка за Младост.
Тренерот на Младост од Богданци, Горан Андоновски за Спортска Мрежа вели дека очекува суперлигашки меч со огромна желба истиот да го добијат. Како што вели охридскиот стратег амбициите на противникот кој летово сериозно се засилил се јасни, особено кога на клупата легендата на македонскиот ракомет Пепи Манасков, но додава дека имаат огромна желба за славје.
„Припремите за сезоната ги започнавме на 28 јули и два месеци пеколно работевме по 3 пати на ден. Нашата екипа е склопена од неколку играчи од страна, најдоброто од Богданци и се вклучени деца од младинската школа. Се надевам дека успеавме да направиме добра хемија во тимот за остварување на целта. Вардар Неготино беше доста активен во летниот преоден рок, се засили на сите позиции со суперлигашки искусни играчи, а на клупата е легендата на македонскиот ракомет Пепи Манасков и јасни се нивните амбиции. Се надевам дека ги очекува пекол во Богданци и полна сала, а нашата огромна желба е да го добиеме овој меч. Очекувам суперлигашки меч и нека победи подобриот“, ни изјави Андоновски.
Едно е јасно – салата во Богданци ќе „крца“ до последно место и ќе се бара простор повеќе за да се следи овој натпревар, а дополнително, тоа ќе биде огромен пекол за Вардар Неготино, а публиката и навивачите најавуваат силна поддршка за Младост.
