Денеска се одиграа два возбудливи натпревари од осминафиналето на Купот на Македонија, а големото изненадување беше на “Билјанини Извори”.
Во Струмица, Детонит Плачковица со минимални 0:1 ја совлада Беласица. Херој на тимот од Радовиш беше Иван Галевски, кој уште во третата минута го постигна единствениот погодок на мечот и го водеше својот клуб кон заслужен пласман во четвртфиналето.
Најголемото изненадување сепак дојде од Охрид, каде домашниот тим го елиминираше прволигашот Шкупи со убедливи 3-0. Иван Глигоров блескаше со два погодоци, а еден гол постигна и искусниот Антонио Калановски, со што охриѓани приредија вистинска сензација.
Со овие резултати, Детонит Плачковица и Охрид обезбедија место во четвртфиналето, па сега ќе се чека на останатите патници за следна фаза од Купот.
Осминафиналната програма продолжува во октомври:
На 8 октомври Шкендија Арачиново ќе го пречека Пелистер.
На 15 октомври следува дербито меѓу Шкендија и Тиквеш.
На 29 октомври ќе се одиграат четири дуели: Башкими – Силекс, Македонија ЃП – Струга, Работнички – Брегалница и Вардар – Новаци.
