Пелистер нанижа четири порази во низа и влезе во резултатска криза, после Шкупи кои има седум порази во низа, прволигашот од Битола е вториот тим со долга низа на порази. Пелистер вчера загуби од Башкими со 1:2 на домашен терен во меч од 7. коло на ПМФЛ.
Капитенот на битолчани, Мирко Ивановски вели дека неочекувано западнале во кризен период на игра и резултати, додава дека е потребна сплотеност и заедништво со цел да излезат од кризата.
„Како капитен сочувствувам со нашите навивачите во овој тежок момент за нашиот клуб и чувствувам потреба да им се обратам. Неочекувано западнавме во кризен период на игра и резултати и потребна ни е сплотеност и заедништво да излеземе од кризата. Се соочуваме со проблеми од разен тип, меѓу нив и повреди, но ако сме сите заедно верувам дека ќе излеземе од негативниот момент. Очекувам поддршка за оваа млада екипа, затоа што сезоната е долга, а во неа имаме многу цели за исполнување. Сакам да им го честитам почетокот на прославата на 40-годишнината на навивачката група „Чкембари“ и ветувам подобри денови. Овој роденден се поклопува со 80-от роденден на нашиот клуб и убеден сум дека заедно ќе славиме сезонава“, вели капитенот Ивановски.
Во следното коло Пелистер ќе има тешко гостување кај перфектната Струга.
