Годинешното издание на Балканскиот клупски куп во женска конкуренција, кое првично беше закажано од 25 до 28 септември во Гњилане (Косово), е одложено од административни причини. Новиот термин за одигрување на турнирот е поместен за периодот од 6 до 8 октомври.
Одлуката ја донесе Балканската одбојкарска асоцијација (БВА) во консултација со Светската одбојкарска федерација (ФИВБ) и Европската одбојкарска асоцијација (ЦЕВ). Главната причина за одложувањето е да им се овозможи на одбојкарките кои настапуваа со своите национални тимови на Светското првенство дополнителен период за одмор пред почетокот на клупските настапи.
Македонија ќе биде претставена од Фит Фан Волеј, кој заедно со домаќинот Дрита (Косово), како и екипите на АЕК (Грција) и Херцег Нови (Црна Гора) ќе се борат за трофејот. Победникот на турнирот обезбедува директен пласман во првото коло од европскиот ЦЕВ Челинџ куп.
Организаторот соопшти дека распоредот и термините на натпреварите остануваат исти како и во првичниот план, единствена промена е новиот датум.
За македонскиот претставник Фит Фан Волеј, ова одложување значи десет дополнителни дена за подготовка и темпирање на формата пред нивното историско деби на меѓународната сцена.
