На Балканскиот шампионат во планински велосипедизам во дисциплината даунхил, кој викендов се одржа во Бугарија на една од најтешките и најпредизвикувачки патеки на Балканот – „Витошкото лале“, македонскиот велосипедист Јовче Даскаловски забележа одличен настап и оствари голем успех.
Битолчанецот се закити со второ место во Мастерс категоријата, а во генералниот пласман успеа да се пробие на 23. позиција од вкупно 172 учесници, што е значаен резултат со оглед на силната конкуренција и тежината на патеката.
Со овој пласман Даскаловски уште еднаш докажа дека е меѓу најдобрите во регионот, а воедно и Македонија доби силна претстава на овој престижен балкански настан. Зад успехот стои и посветената работа на неговиот клуб Extreme Bike Team Bitola, кој континуирано вложува во развојот на планинскиот велосипедизам и во подготовките на своите натпреварувачи.
