Во СЦ „Борис Трајковски“ се одигра едно од највозбудливите дерби средби во ракометната Суперлига, каде Вардар 1961 со многу мака успеа да го совлада ГРК Охрид со 33-31.
Натпреварот започна изедначено, со серија на брзи голови на двете страни. Вардар во еден момент поведе со четири разлика, но охриѓани не се предадоа и со цврста игра во одбраната и прецизни изведби од линијата на седум метри успеаја да ја намалат негативата. На паузата „црвено-црните“ имаа предност од 17-15.
Вториот дел донесе уште поголема драма.
Скопјани константно одржуваа водство, но „гладијаторите“ од Охрид во последните минути се доближија на само еден гол негатива.
Сепак, искуството на домаќините пресуди – Урош Митровиќ и Вуко Борозан погодија во клучни моменти, а Васил Гогов со неколку одбрани им овозможи на Вардарци да стигнат до третата победа сезонава. Митровиќ заврши со 8 гола, а кај гостите најпрецизен беше Дарко Ѓукиќ, исто така со 8 погодоци.
