Минатиот викенд 17-годишниот Стефан Тренески го имаше своето деби на престижното Формула 4 првенство, возејќи на познатата патека Словакијаринг во Словачка, како дел од тимот на Јаник Моторспорт. Со тоа, Македонија за првпат во историјата доби свој претставник во ова реномирано натпреварување.
„Беше тежок натпревар, конкуренцијата е силна. Се работи за врвни возачи со неколкугодишно искуство во овие натпревари, но тоа за мене не претставуваше препрека, туку напротив – предизвик да се впуштам во борба за највисока позиција уште од самиот старт. Во една ситуација бев истуркан надвор од патеката од страна на еден натпреварувач, па затоа завршив на 13-та позиција. Сепак, од овој прв Формула 4 настап добив големо искуство за болидот, начинот на управување, како и комуникацијата со моите инженери од Јаник Моторспорт. На следниот натпревар во Брно, Чешка одиме многу поподготвени,“ – изјави Тренески.
Со ова деби, младиот возач не само што ја отвори вратата за својата меѓународна кариера, туку испиша и ново поглавје за македонскиот автомобилизам.
Последниот натпревар од сезоната во Формула 4 ЦЕЗ првенството ќе се вози на патеката Брно во Чешка, на 6 и 7 септември.
