Навивачите на Еурофарм Пелистер конечно можат да здивнат! Голманот Сеид Хеидарирад нема сериозна повреда и ќе мирува само една недела, по што се очекува да биде подготвен за официјалниот старт на новата сезона.
Иранскиот репрезентативец се повреди на вчерашното дерби против Вардар, одиграно во рамките на меморијалниот турнир „Крсте Андоновски“. Сепак, лекарските прегледи покажаа дека не станува збор за потешка повреда, што е одлична вест за битолчани.
Хеидарирад беше еден од најзабележителните играчи на мечот со 15 одбрани и еден постигнат погодок, а по неговото излегување блескаше и Брестовац кој успешно ја презеде улогата меѓу стативите.
Со оваа вест, шампионот може мирно да ги продолжи подготовките и да влезе максимално подготвен во борбата за одбрана на титулата.
Еурофарм Пелистер продолжува со силни амбиции и очекува целосен состав за почетокот на сезоната.
