ЖФК Билјанини Извори се врати во Охрид по учеството на престижниот меѓународен турнир „Школа спорта и језика – Сурдулица 2025“, кој се одржа од 16 до 21 август во Сурдулица, Србија.
Охридскиот клуб, поранешен шампион на Македонија и учесник во квалификациите за Лигата на шампиони, го искористи овој турнир како одлична подготовка и воигрување за новата сезона, во која амбициите се насочени кон освојување на шампионската титула во Втората женска лига и враќање во елитното друштво.
Турнирот овозможи не само спортски натпревари, туку и размена на искуства, стекнување нови знаења, културни активности и зајакнување на пријателствата со клубови од регионот. Настапот беше поддржан од Општина Дебарца и градоначалникот Зоран Ногачески (главен спонзор за превоз) и Струга Трим Лум (главен спонзор), кои несебично го поддржуваат развојот и промоцијата на женскиот фудбал.
За време на турнирот, претседателот на ЖФК Билјанини Извори, Јовче Попоски, оствари значајна средба со двајца министри од Владата на Република Србија – Новица Тончев и Ѓорѓе Миличевиќ. Како знак на благодарност и спортска соработка, Попоски им подари дрес од македонската репрезентација и фудбалска топка со амблемот на ФФМ.
Под водство на тренерот Александра Рубаноска, охридските девојки се вратија со ново искуство, дополнителна самодоверба и силна мотивација за претстојната сезона, подготвени да ја испишат новата успешна страница во историјата на клубот.
