Денес од Охрид, ЖФК Билјанини Извори отпатува за Сурдулица, Србија, каде од 16 до 21 август ќе го претставува Охрид и Македонија на престижниот меѓународен турнир „Школа спорта и језика – Сурдулица 2025“.
Охридскиот клуб, поранешен шампион на Македонија и учесник во квалификациите за Лигата на шампиони, во новата сезона влегува со полна мотивација и амбиција. Тимот е прв фаворит за освојување на шампионската титула во Втората женска фудбалска лига и враќање во елитното друштво.
Настапот во Сурдулица е поддржан од Општина Дебарца (главен спонзор за превоз) и Струга Трим Лум (главен спонзор), кои несебично го поддржуваат развојот и промоцијата на женскиот фудбал. Под водство на тренерот Александра Рубаноска, охридските девојки тренираат со голема посветеност и борбеност, подготвени да ја испишат најуспешната страница во историјата на клубот.
Турнирот ќе биде идеална прилика за проверка на формата, стекнување меѓународно искуство, културни активности и нови пријателства.
