ФФМ започнува со значајна донација за клубовите и младинските екипи. Во рамки на иницијативата, 72 клуба од Трета МФЛ ќе добијат околу 1.400 фудбалски топки, додека 140 младински тимови од Супер лигата, Втората и Третата младинска лига ќе добијат повеќе од 3.000 топки.
Оваа донација им овозможува на клубовите неопходна опрема за тренинзи и натпревари, со цел создавање подобри услови за работа и развој на младите фудбалери. Иницијативата е дел од континуираната заложба на ФФМ за еднакви можности и квалитетни услови за сите клубови, без разлика во кој ранг на натпреварување учествуваат.
ФФМ најавува дека во декември ќе следува уште една донација на опрема за младинските категории, како дел од долгорочниот план за поддршка на развојот на фудбалот во земјата. Во претходниот период, федерацијата донираше речиси 2.000 топки на сите Општински фудбалски сојузи, а клубовите од Првата МФЛ добија по 30 ПУМА топки.
