Македонскиот шампион Шкендија го заврши својот пат во квалификациите за Лигата на шампионите, откако на гостувањето во Баку претрпе убедлив пораз од азербејџанскиот првак Карабах со 5-1. Со овој резултат, тетовчани беа елиминирани во третото квалификациско коло, но ќе продолжат во плеј-оф фазата за пласман во групната фаза на Лигата на Европа.
Тетовци одлично го отворија реваншот на стадионот „Тофик Бахрамов“. Веќе во 10. минута, Сенегалецот Фабрис Тамба по мајсторско додавање на Бесарт Ибраими се најде сам пред голманот и ја затресе мрежата за 0-1. Но, радоста траеше само шест минути – несреќен автогол на Клинсман Цаке по центаршут од десната страна го врати домаќинот во игра.
Веќе во 18. минута, Кади Боргес донесе целосен пресврт, а Карабах не застана тука. Во 33. минута, Зубир мајсторски асистира до Акунѕаде за 3-1, а само две минути подоцна Јанковиќ од пенал зголеми на 4-1, резултат со кој заврши првото полувреме.
Иако тренерот Ардијан Беќири направи две замени на паузата во обид да го смири налетот на Азербејџанците, Карабах продолжи да доминира. Во 59. минута, Леандро Андраде ја затресе мрежата за конечни 5-1, резултат кој ја потврди класата на домаќинот.
Во последните дваесетина минути темпото се намали, а Карабах рутински го заврши мечот, обезбедувајќи пласман во плеј-офот за Лигата на шампионите и најмалку место во групната фаза на Лига Европа.
Шкендија, пак, ќе ја продолжи својата европска авантура во Лигата на Европа, каде во плеј-офот ќе се соочи со поразениот од двомечот меѓу Лудогорец и Ференцварош.
