Македонската машка А репрезентација ќе одигра пријателски натпревар против Саудиска Арабија на 4 септември, во рамки на резервиран термин од ФИФА. Мечот ќе се игра на стадионот „Викторија“ во Прага, Чешка, со почеток во 17:00 часот.
Ова ќе биде трет пат двете селекции да се сретнат на теренот. Првиот натпревар се одигра во Ријад на 1 август 2001 година и заврши со резултат 1:1. Вториот дуел се одигра на 22 октомври 2022 година во Абу Даби, каде Саудиска Арабија извојува тесна победа од 1:0. Тогаш македонскиот тим беше составен од играчи од домашната лига.
Овој контролен меч е од големо значење за селекторот Благоја Милевски, кој ќе има можност да ја тестира формата на играчите и да ги проба тактичко техничките варијанти пред продолжението на квалификациските натпревари за Светското првенство 2026. Само три дена по мечот во Прага, Македонија ќе ја пречека селекцијата на Лихтенштајн на Националната арена „Тодор Проески“ во Скопје.
