Женската сениорска одбојкарска репрезентација на Македонија, очекувано, доживеа пораз од селекцијата на Грција со 0:3 (8:25, 11:25, 19:25) во претпоследниот натпревар од квалификацискиот циклус за Европското првенство 2026.
Македонската селекција веќе немаше шанси за пласман на Европското првенство, па натпреварот со фаворизираната Грција претставуваше можност за достојно претставување пред домашната публика, во последниот меч ова лето на домашен терен. Сепак, избраничките на селекторот Стефан Пауновиќ успеаја да парираат само во третиот сет, додека во првите два беа целосно надиграни од поискусниот противник.
Грција, која веќе го обезбеди своето место на ЕуроВолеј 2026, целосно го контролираше натпреварот и доминираше во сите сегменти на играта. Предводена од ефикасните Тикманиду со 14 и Бака со 12 поени, гостинската репрезентација не остави простор за изненадување. Македонската селекција се соочи со сериозни проблеми – бројни технички грешки, нестабилен прием и слаба игра во дефанзива, а не успеа да најде решение ниту за цврстиот грчки блок, кој забележа дури 12 поени.
Најголема борбеност македонските одбојкарки покажаа во третиот сет, кога поведоа со 3:0, а потоа и со 17:12 по серија од 7-0. Сепак, искусната грчка селекција контролата ја врати и го завери триумфот без загубен сет.
Најефикасна во нашиот тим беше Теа Терзиевска со 12 поени, додека Ива Стојкоска и Мери Бошковска постигнаа по четири, а Тамара Стојанова и Лиља Ковачевиќ запишаа по три поени.
Квалификацискиот циклус Македонија ќе го затвори на 9 август, со гостување во австрискиот град Хартберг каде ќе се соочи со репрезентацијата на Австрија.
