Вчера со воведниот меч во Куманово започна новата натпреварувачка сезона 2024/2025 во Првата футсал лига, а во воведниот меч шампионот Форца тргна со убедлива победа откако со 11:1 го декласираше Железарец.
Иван Крстевски во 4. минута постигна гол за 1:0, а по една минута Дарко Цветковски израмни на 1:1. До крајот на првиот дел резултатот беше 4:1, а во второто полувреме Железарец буквално се распадна и немаше капацитет да парира и да го запре налетот на пресилниот тим на Форца.
За екипата на Форца во листата на стрелци покрај Крстевски се запишаа и Камило Андрес Гомез Венегас, Даниел Марино Де Соуза и Зоран Левески со по два гола, а по еден гол постигнаа Кристиан Аберто Беррио Хојос, Таулант Исмаили, Берат Рамадани и Луис Конзало Посадо Куитеро.
Колото ќе се комплетира во понеделник со четири натпревари. Осогово сезоната ја отвара дома против Кеги Моби, Јувентус Серава ќе игра со Шкупи, Црна Река ќе го пречека повратникот Проект, а пак Бутел ќе игра со Клими.
