Четвртата рунда во Втората женска фудбалска лига донесе рекорден број на постигнати погодоци, откако беа постигнати 39 погодоци, а резултатите од оваа коло повеќе личат како на резултати од ракомет, отколку на фудбалски резултати.
Фаворитот Кочани во Велес со 1:16 буквално го „распадна“ Борец, откако домаќинот повеќе од јасно се знаеше дека ќе биде инфериорен противник без било какви можности да дури и да парира за помал пораз. Екипата на Кочани на овој натпревари билдаше гол разлика, а Афродита Салихи успеа да ја „искина“ мрежата во Велес, откако поранешната репрезентативка даде 11 гола, а домашната голманка Гордана Милошевиќ беше немоќна во налетот на искусната Салихи.
Ангела Стојковска постигна хет-трик, репрезентативката Катерина Милеска беше стрелец на еден гол, а за работите да бидат уште полоши за домашниот тим, Марија Будинова си постигна автогол. Единствен стрелец за домашниот тим беше Александра Пешова.
Доминација на Вардар во Валандово откако однесе убедлива победа од 1:13 над Победа Валандово во меч каде фаворитот доминирараше против младата екипа на домашниот тим, со што уште еднаш се потврдуваат разликите во квалитетот. Мила Наумовска и Џенита Кицара постигнааа по четири погодоци, а хет-трик запиша Теодора Јанковска, по еден гол постигнаа Миа Закев и Елена Костадиноска.
Нов голем пораз за Слободен откако екипата на Билјанини Извори од Охрид со 0:6 славеше висока победа. Александра Алексиеска и голгетерката Марија Јулчовска беа двојни стрелци, а по еден гол постигнаа Стефанија Ристова и Ивана Николоска.
Во рамки на 4. коло најнеизвесен меч се одигра во Македонски Брод каде Порече беше поразен од радовишка Плачковица со 0:2 со што радовишкиот тим се израдува на првата сезонска победа. Натпреварот беше решен во вториот дел кога Марија Бојкова во 50. минута погоди за 0:1, а Викторија Лазова во 85. минута беше прецизна за конечни 0:2.
