Кораби во рамки на 4. коло од Трета лига Југ се соочи со Кравари, каде домашниот тим кој е шампон од претходната сезона, но не го помина баражот за Втора лига славеше со 3:1. Трим Амбари беше двоен стрелец за домаќинот, а гол даде и Фатјон Леши, додека пак за гостинот единствен стрелец беше Темур Емини.
Лидерот Преспа на Градскиот стадион во Ресен ја пречека Сатеска од Волино каде двете екипи ремизираа играјќи 1:1, со што гостинот откина бодови од домаќинот. Даниел Цветаноски погоди во 12. минута за 0:1, а Преспа во вториот дел преку Неџми Реџепи дојде до конечните 1:1.
Демир Хисар на домашен терен играше со ланскиот второлигаш Караорман од Струга, каде домашниот тим со 4:3 однесе победа, а со тоа струшкиот третолигаш се втурна во резултатска криза. Наместо борба за враќање во Втората лига, Караорман нижи порази.
Стефан Каревски беше играч на мечот откако даде три гола за домашниот тим, а гол даде и Христијан Китановски, за гостинот од Струга стрелци беа Христијан Спироски, Игор Клечкароски и Ивица Ќелешоски.
Светлост на домашен терен беше поразен од Евротип со минимални 0:1 со голот на Владе Јанакиевски во 57. минута.
На теренот со вештачка трева на спортскиот комплекс „Билјанини Извори“ во Охрид паднаа осум гола за реми од 4:4 на Света Троица и Велешта. Двата нови третолигаши одиграа одличен меч, а на крај мораа да се задоволат со поделба на бодовите. Домаќинот имаше предност од 3:1 на полувреме, откако Никола Угриноски во 12. минута постигна гол за 1:0, а пак Дарко Цветаноски по четири минути постигна гол за 2:0. Не требаше многу за Велешта да прими и трет гол, откако Теодор Речкоски во 21. минута обезбеди 3:0 за домаќинот. Мертион Мерко во 37. минута постигна гол за 3:1 на полувреме.
Во вториот дел Велешта преку втор гол на Мерко дојде до 3:2, а преку Емлаз Шеи гостинот дојде и до 3:3. Угриноски со втор гол во 83. минута донесе ново водство за Света Троица, но во 88. минута Аљбрим Положани постигна гол за конечни 4:4 и поделба на бодовите.
Влазними беше домаќин на Славеј од Мешеишта каде гостинот ја бараш првата сезонска победа, но домашниот тим на крилата на Денис Шадов кој постигна хет-трик однесе победа од 5:2. За Влазними двоен стрелец беше Насер Доко. За гостинскиот тим Виктор Гелевски и Димитар Јановски беа стрелци.
