Македонскиот напаѓач Георг Стојановски е ново засилување на бугарскиот прволигаш Спартак Варна. 21- годишниот фудбалер ќе има исклучително ретка можност да игра под водство на својот дедо – познатиот македонски стратег Ѓоко Хаџиевски, кој неодамна беше поставен за шеф на стручниот штаб на клубот.
Оваа фудбалска приказна добива посебна димензија ако се знае дека Хаџиевски е едно од најреномираните тренерски имиња од Македонија, со богата меѓународна кариера, а сега ќе има шанса да го води својот внук на професионално ниво.
Стојановски доаѓа од македонскиот прволигаш Шкупи, а неговото фудбалско израснување започна во младинските категории на Вардар. Потоа ги носеше дресовите на Тетекс и Работнички, а во странство настапуваше за екипата на Хата од Обединетите Арапски Емирати, стекнувајќи драгоцено интернационално искуство.
Во дресот на Спартак Варна ќе ја засили напаѓачката линија на тимот, каде што ќе конкурира за место во стартниот состав. Стојановски ќе има шанса да се докаже на поголема сцена и да се етаблира како значаен офанзивен адут, особено со поддршката и насоките од својот дедо на клупата.
Со ангажманот на Георг Стојановски и назначувањето на Ѓоко Хаџиевски како шеф на стручниот штаб, Спартак Варна јасно демонстрира сериозни амбиции за настап во бугарската Прва лига, посакувајќи стабилност и подобар пласман во новата сезона.
