Амбициозниот клуб од градот под Самуиловата Тврдина- ГРК Охрид, најавува сериозна борба во ракометната Супер лига, во новата сезона. Имено, клубот официјално започна со подготовките и тренинзите, заангажирано тренира, воигрувајќи се со новиот тренер, и новите бројни засилувања. Формата ќе ја темпира и со учествата на ,, Струшкиот Турнир “, од 13-16 Август, како и на Меѓународниот Турнир ,, Крсте Андоновски “, во улога на домаќин. Исто така, предвидено е и да се одиграат неколку пријателски средби со екипата на Алкалоид.
Спортскиот директор на клубот- Славчо Ристески, во изјава за медиуми истакна дека подготовките ќе се одвиваат во Охрид, а формата ќе се темпира со учествата на горенаведените турнири:
Базичните подготовки ќе се одвиваат во Охрид, нашиот град има одлични услови за тоа. Учествуваме на “Струшкиот Турнир” од 13-16 август и ќе одиграме 3 натпревари, потоа ни следи Меѓународниот Турнир “Крсте Андоновски” каде ќе одиграме 4 натпревари. Турнирот е во наша организација кој од година во година е се подобар и подобар, па пред првиот натпревар во Македонската машка ракометна лига со екипата на Алкалоид можно е да одиграме уште еден-два подготвителни натпревари.
Тој смета дека Охрид има големи шанси во ЕХФ Европскиот Куп за поголем успех од лани, но полека и фокусирано, резултатите сами ќе дојдат и се надева дека ќе имаат многу причини за радост во новата сезона:
Во ЕХФ Европскиот Куп сме носители и имаме “лесен противник” кој фокусирано треба да се одработи, па чекор по чекор со мала среќа во ждребот барем да ја “презимиме” Европа и да ја полниме СРЦ Билјанини Извори и во февруари. Посакувам сите играчи пред се да се здрави, а со нивниот квалитет позитивните резултати ќе дојдат. Со одличниот стручен штаб, на чело со нашиот тренер Ројевиќ, како и со поддршката на нашата верна публика мислам дека често ќе се радуваме во оваа сезона- додава спортскиот директор на ГРК Охрид, Славчо Ристески.
