Прволигашот Шкупи го засили нападот со искусен интернационалец – 35-годишниот Магаје Геје е новото звучно име во тимот.
Сенегалецот има богата фудбалска биографија, со настапи во неколку европски елитни лиги. Геје од 2010 до 2014 година беше дел од англискиот премиерлигаш Евертон, по што настапуваше за Милвол во Чемпионшип лигата. Кариерата ја започна во францускиот Стразбур, а понатаму ги бранеше боите и на Брест (Франција), Аданаспор, Османлиспор и Карабах (Турција), како и на романски Динамо Букурешт.
Најголем дел од својата кариера го помина во Турција, каде одигра 77 натпревари и постигна 25 голови. Има и 24 настапи во Премиер лигата со Евертон, а се одликува со искуство, физичка подготвеност и добар голгетерски инстинкт.
Единствена забелешка е тоа што Геје во последните две години беше без клуб, што значи дека ќе му биде потребно време за целосна натпреварувачка форма. Сепак, во Шкупи веруваат дека неговото искуство ќе биде голем адут за настапите на домашната и евентуално меѓународната сцена.
