Женската фудбалска репрезентација на Шпанија се пласира во финалето на Европското првенство 2025, откако синоќа ја совлада Германија со минимални 1:0 по продолженија, во драматичен натпревар одигран на стадионот „Санкт Јакоб Парк“ во Швајцарија.
Регуларниот дел од натпреварот помина без голови, но не и без возбуда. Двете репрезентации прикажаа цврста и тактички прецизна игра, со малку простор за креација во напад. Германија имаше неколку опасни шанси, особено преку Клара Бил, но шпанската голманка Кол блесна со серија одлични интервенции.
Највозбудливиот момент дојде во 94. минута, кога Кол имаше спектакуларна двојна одбрана, прво скротувајки го ударот на Бил, а веднаш потоа и на Вамсер, со што го спаси својот тим од елиминација.
Решавачкиот момент на натпреварот дојде во 113. минута. По брз напад по десната страна, дел Кастиљо нафрли топка во шеснаесетникот, а Ајтана Бонмати со прецизен и силен удар од десна страна ја матираше германската голманка Ан-Катрин Бергер и го донесе водството за „Ла Роха“.
До крајот на натпреварот, Германките се обидоа да израмнат, но безуспешно – шпанската одбрана остана цврста и сигурна, а Ката Кол уште еднаш ја покажа својата доминација меѓу стативите.
Шпанија ќе игра во финалето на Европското првенство 2025, закажано за 27 јули, каде што ќе се соочи со Англија, која во второто полуфинале ја елиминираше Италија.
Ова е прво финале за Шпанија на европските првенства и реприза на финалето од последното светско првенство.
- Листа на стрелци:
Естер Гонзалес (Шпанија) – 4
Алексија Путељас (Шпанија) – 3
Кристијана Гирели (Италија) – 3
Лорен Џејмс (Англија) – 2
Ела Тун (Англија) – 2
Џорџија Стенвеј (Англија) – 2
Гордана Кочева, Спортска Мрежа
