Македонскиот репрезентативец Бојан Миовски го освои својот прв трофеј како фудбалер на шпанската Џирона, откако неговиот тим триумфираше во финалето од Купот на Каталонија, совладувајќи го Еспањол по изведување пенали.
Финалниот натпревар заврши без голови во регуларниот дел (0-0), а во пенал-рулетот поуспешни беа играчите на Џирона, кои победија со 5-4. Миовски влезе во игра на почетокот на второто полувреме, одигра сигурно и со ладнокрвна реализација го погоди вториот пенал за својот тим.
Овој трофеј е од големо значење за Џирона, бидејќи доаѓа токму на 95-годишнината од основањето на клубот, што го прави уште повреден и симболичен успех.
За Миовски, ова е одличен старт во новата средина и силен мотив пред почетокот на сезоната во Ла Лига, каде што Џирона ќе настапува со високи амбиции по историски добрата измината сезона.
